Prevendido, nag-inusara midaug sa Pacquiao Cup

SI JOHN Ednoel Prevendido maoy nag-inusarang midaug alang sa Davao City sa final day sa Mindanao Quarter Finals sa PSC-Pacquiao Amateur Boxing Cup niadtong Dominggo didto sa Kidapawan City Gym.

Gilampaso ni Prevendido si CDO's Romilo Junio sa unanimous decision sa Youth Boys light flyweight (46-49 kg.) division aron mahatagan og ikaduhang daug alang sa Mayor Inday Sara Duterte-Carpio's team.

Ang laing Davao boxer abante sa Mindanao Semi-Finals sa Marso 3 sa Cagayan de Oro City mao si Reymond Albupera, kinsa mipalukapa kang Gen. Santos City's Rex Ayuban pinaagi sa split decision, 3-2 sa Jr. Boys light flyweight (48 kg.) category niadtong Sabado.

Samtang si Ariel Almamento ug RV Denega midaug sab alang sa General Santos City nga may upat nga boksidor sa semifinals.

Samtang ang CDO ang nagpabilin nga pinakadaghang boksidor nga sibog sa semi-finals nga dunay unom ka pambato gikan sa unang adlaw.

Ang Digos City ubos ni coach Renato Moreno maoy ikaduhang "best team" nga dunay lima ka daug sa duha ka adlaw nga torneyo nga giisponsoran sa Philippine Sports Commission sa koordinasyon sa opisina ni Senator Manny Pacquiao. (LDR/PR)