2 Dabawenyong boksidor natagak sa PSC-Pacquiao Cup

DUHA ka boksidor gikan sa Davao City natagak na sa PSC-Pacquiao Amateur Boxing Cup human mapildi sa Mindanao Quarter Finals niadtong Sabado didto sa Kidapawan City Gym.

Napayukbo si Emmanuel Canubas sa mas taas nga si Peter John Payla sa Cagayan de Oro City pinaagi sa unanimous decision sa Jr. Boys Pinweight (44-46 kg.) division.

Si Payla, pag-umangkon ni 2006 Asian Games flyweight champion Violito, mipahimulos sa iyang taas nga kawhat batok Canubas.

Napildi sab si Cyril Ivan Revilla kang Jester Dapidran sa Digos City sa parehong desisyon sa Jr. Boys flyweight (50 kg.) category.

Ang ig-agaw ni 8-division world champion Manny Pacquiao mas daghan tugpa nga jabs ug bodyshots alang sa kadaugan.

Ang miluwas sa Davao City mao si Reymond Albupera human gi-eskapo pinaagi sa split decision (3-2) kontra Rey Ayuban sa General Santos City sa Jr. Boys Light Flyweight (48 kg.) division.

Laing tulo ka boksidor pambato sa Davao ang makita sa aksyon sa nationwide grassroots development program nga gisponsoran sa Philippine Sports Commissioner.

Si John Ednoel Prevendido makalaban si Romilo Junio sa Cagayan de Oro City sa Youth Boys Light flyweight (46-49 kg.) category samtang si Curt Nnelgy Manigsasa maka-atbang si Aglayan's Arceboy Baranggan sa flyweight (52 kg.) division.

Makaharong sab ni Joshua Padual ang taga-Sultan Kudarat nga si Remark Brillo sa bantamweight (56 kg.) category.

Samtang si Philippine Sports Commissioner Charles Raymond Maxey ang guest speaker atol sa opening program ug gitambongan ni 1996 Atlanta Olympics silver medalist Mansueto "Onyok" Velasco.

Ang Mindanao Finals i-host sa Davao City sa Marso 24. (LDR/PR)