Uwahing duwa

Marianne L. Saberon-Abalayan

ANG mga pambato sa Davao makigtigi sa titulo sa 25th Shell National Youth Active Chess Championships (SNYACC) grand finals, ang uwahing edisyon sa pinakataas youth chessfest sa nasud didto sa Mall of Asia Arena sa Pasay City karong adlawa.

Sila SNYACC Southern Mindanao leg champions Wesley Jovan Magbanua (kiddies), Aaron Japeth Caresosa (juniors) and Andre Miguel Jorgio (seniors) kauban ang laing qualifiers Irish Yngayo, Charliemagne Arias, Cyrhea Ruth Atog, Kurth John Placencia, Gino Angelo Asuncion ug Dhona Yngayo ang milupad na sa Manila niadtong Biyernes nga isponsor sa Pilipinas Shell Petroleum Corporation.

Ang maong kompaniya ang motubag sab sa ilang board and lodging diin ang Under-18 players giubanan sa ginikanan, coach o guardian.

Si Davao Central College's Yngayo, Southern Mindanao leg regional junior division runner-up and junior top female awardee, miingon nga himuon niya ang tanan aron nga mokampeyon samtang miangkon siya nga nagsubo tungod tapuson na sa kompaniya ang maong kompetisyon human sa 25 ka tuig.

"Paningkamutan jud nako, himuon nako ang tanang makaya nako sa tournament," sulti sa 14 anyos kinsa nagsugod sa SNYACC niadtong 4 anyos pa siya.

Samtang si Magbanua, 12, Grade 7 student sa Jose Maria College (JMC), miingon nga gusto niya makuha ang titulo sa kiddies dibisyon.

"Target nako ang championship bisan first time nako makaabot sa national finals."

Ang anak nila Wilson, pastor, ug Eleonor, housewife, nimarka sab og unang higayon nga makasakay og eroplano.

Dakong premyong kuwarta ug tropeyo ang naghulat sa modaug sa paduwa nga gitugutan sa National Chess Federation of the Philippines.