P150,000 premyo sa Gamao tennis

Marianne L. Saberon-Abalayan

MOABOT sa kinatibuk-ang P150,000 ang premyo sa Mayor James Gamao National Invitational Tennis Championship 2017 sa Oktubre 19 hangtud 22 sa Panabo City.

Apan matud ni tournament director Boy Diong nga dili pa pinal ang "breakdown" sa premyo.

Si Diong, kinsa bisita sa Davao Sportswriters Association (DSA) Forum sa NCCC Mall Davao Food Cove, miingon nga ang bag-ong tennis courts sa Panabo City naabot ang standards, "just like the ones our invited players are used to playing on in Manila."

Sila top-ranked Patrick John Tierro ug tournament defending champion Butuan City native Johnny Arcilla kauban sila Leander Lazaro, Mark Anthony Alcoseba sa Davao City, John Mari Altiche, Noel Mariano Damian, Jr., Elbert Vicente Anasta ug Fritz Chris Verdad tungaon sa duha ka brackets.

Ang matag magduduwa sa group magduwa sa round robin format.

Samtang ang duha nga manguna maoy abante sa semifinals diin ang modaug maoy magkontra sa finals sa torneyo nga gisuportahan sa Merco and Selecta kauban si Engr. Glenn Olandria, Bioxtend, Stronghold Insurance, Swiss Deli, Mamma Marias ni Paul Abao, Rocky's Barbershop ni Timtom Gempesaw, Asiatraders ug Slazenger.

Ang kampeyon ug runner-up makadawat og premyong kuwarta samtang ang semifinalist ug quarterfinalist di sab mouli nga way madalang premyo.

"We will hold a free tennis clinic for eight to 16 years old," ni Diong, kinsa certified International Tennis Federation coach ug kanhi rated player sa nasud sa iyang panahon.

Nagpasalamat sab siya kang Engineer Glen Olandria sa Panabo City Engineer's Office sa pag-inisiyet sa pagpahigayon sa kompetisyon sa ilang siyudad aron ipromotar ang isports sa lugar aron mahilayo sa di maayo ang mga kabatan-onan.

Ang kompetisyon, ikaunom tuig na karon nga kaniadto ginahimo sa Davao City.