PWC gilampaso ang HCCA, 105-32, sa DACS

ANG Philippine Women's College (PWC) Patriots mitala og dakong lamang, 29-5, sa unang period ug wala na gipaapas pa ang Holy Cross College of Agdao (HCCA), 105-32, sa pagbalik sa Davao Association of Catholic Schools (Dacs) Sports Festival High School Basketball Tournament didto sa PWC basketball gym sa Juna Subdivision, Davao City bag-ohay lang.

Si Rax Actub mibulsa og 23 puntos alang sa Patriots samtang midugang si Maniago og 14 puntos aron maselyo ang kadaogan.

Ubos ni Coach Laurence Bencio sa PWC kinsa miduwa sab bag-ohay lang sa Flying V Cup diin nakaposte sila og upat ka sagunsong daug una natagak sa quarterfinals.

Apan napildi ang PWC, sa Holy Cross College of Sasa (HCCS) aron makabalos sa ilang sister team, 85-82, sa duwa sa hapon.

Ang kompetisyon usa ka qualifying alang sa Davao City Athletic Association (DCAA) Meet padulong sa Davao Region Athletic Association (Davraa) Meet 2018 nga i-host sa Davao City.

Samtang, si Sports Development Division of the City Mayor's Office (SDD-CMO) officer-in-charge Mikey Aportadera una na nga misulti nga nangandam na sila sa Davraaa Meet hosting.

Nagpahigayon na sab og coordination meetings sa Department of Education Davao City Division ug laing stakeholders.

Ang University of Mindanao Olympic-sized track oval ug the Davao City-University of the Philippines-Mindanao Sports Complex Olympic-sized pool usa sa mga venues.

Gipaneguro ni Aportadera ang seguridad ug billeting concerns aron molampos sa regional meet nga maoy qualifying alang sa Palarong Pambansa.