1st Kadayawan dragon boat competition sugdan karon

ANDAM na ang tanan alang sa 1st Kadayawan Festival National Dragon Boat Competition nga tigian karong Sabado, Agosto 12, sa Sta. Ana Wharf.

Si Clarice Jane Calolot of Dragons del Sur, event chair, mipahibawo niini sa Davao Sportswriters Association (DSA) Forum sa Family Room of NCCC Mall B3 niadtong Huwebes.

Matud ni Calolot, ang Davao City-bound technical officials gikan sa Philippine Canoe Kayak Dragon Boat Federation, National Sports Association sa Philippine Olympic Committee ug Philippine Sports Commission (PSC), maoy mopasilidad sa kalihukan sa unang higayon nga apil sa Kadayawan Sports Festival calendar.

"This event was included because the city wanted to showcase that Davao City has the potential to host international and national Dragon Boat competitions," tin-aw ni Calolot kon diin dugang nagkanayon nga apil sab kini sa grassroots development program sa PSC.

Gibutyag niya nga dunay 10 licensed champion dragon boats ang gamiton sa torneyo.

Makalaban sa Davao City Dragons del Sur ang upat ka Manila-based teams, Philippine Airforce, Philippine National Police Maritime, Cebu Ariya Dragon Boat, Team Dipolog, Team Hilera of Dumaguete, Aqua Fotis ug SeaHawks sa open standard, mixed standard, women's small boat, mix small boat ug open small boat categories.

Ang kampeyon sa standard competitions makadawat og P20,000 samtang ang sunod nga duha ka puwesto mouli og P15,000 ug P10,000 gikan sa SDD-CMO.

Samtang ang tulo manguna sa small boat events mouli og P15,000, P10,000 ug P5,000, sa maong han-ay. (Marizz S. Robilla)