Davao nangandam sa pag-host og Davraa 2018

Marianne L. Saberon-Abalayan

NAGPREPARAR na ang Davao City sa pag-host sa Davao Region Athletic Association (Davraa) Meet sa umaabot Pebrero 2018.

Kini ang pahayag ni Sports Development Division of the City Mayor's Office (SDD-CMO) officer-in-charge Mikey Aportadera atol sa Davao Sportswriters Association (DSA) Forum didto sa NCCC Mall Davao B3 Family Room niadtong Huwebes.

Niya pa, "Han-ay na. Ga-meeting na mi sa Deped every week to cater all aspects of the hosting. All systems go, as of now dako na na-cover sa among preparations. Implementation nalang."

Dugang ni Aportadera nga nakahimamat na sab niya si University of Mindanao (UM) president Guillermo Torres, Jr. kinsa miuyon nga mo-host sa opening ug closing ceremonies sa Davraa Meet ug himuon ang athletics competition ug uban pa events sa ilang unibersidad.

Bag-ohay lang nakompleto na sa UM ang Olympic-sized rubberized track oval sa Matina campus.

Dugang sa city sports chief nga si Torres misugot sa paglibre sa paggamit sa pasilidad alang sa regional qualifying meet.

"The rest of the other events will be distributed around Davao City but swimming will be held at the Davao City-UP Sports Complex. We are good to go," ni Aportadera nga midugang nga ang Olympic-sized 50-meter swimming pool gilauman mahuman karong Disyembre.

Gipaneguro ni Aportadera nga di mangatulog sa karton o semento ang mga atleta nga sama sa nahitabo Davraa ug ubang pang Palaro delegates nga sayo naabot sa matag tuig nga sportsfest alang elementarya ug sekondarya didto sa Antique Province.

Sumala niya nga nagpulong na sila niadtong milabay nga bulan aron maseguro kung unsa ang gusto ni Davao City Mayor Sara Duterte Carpio nga mahitabo sa hosting.

"Si Mayor specifically instructed nga kinahanglan well taken cared of ang mga athletes. Gusto ni mayor limpyo ug makatulog og tarong ang mga bata. Amo jud nang paningkamutan," niya pa.

Niya pa nga ang Davraa hosting usa ka pre-requisite alang sa siyudad sa pag-host sa 2019 Palarong Pambansa.

"Even before the declaration of the Palaro, Mayor Sara really has eyes on hosting the Palaro. That's why she really said yes to the Davraa hosting as she really targets to bid for the hosting of the Palaro 2019," saysay niya.

Ang uwahing pag-host sa Davao City sa regional meet niadtong napulo ka tuig milabay.