Criterium cycling maglumba sa Mayo 28

MISUPORTA ang Sports Development Division-City Mayor's Office (SDD-CMO) sa Summerfest 2017 Criterium Cycling Race sa Mayo 28 sa Crocodile Park Grounds.

Matud ni PhilCycling deputy secretary-general Salvador "Jun" Paholio, sa Facebook message sa SunStar Davao, nga ang aktibidad gi-organisa sa Davao City Sports Consumer Cooperative (DCSCC) nga dunay "road bike race" ug gilauman nga may partisipante gikan sa nakalain-laing lugar.

"This aims to promote the sports tourism and sports development program in Davao City this summer," ni Paholio dugang nga motabang sab sa National Sports Association (NSA) sa cycling nga magpadayon sa pagdiskubre og atleta nga mamahimong mopresenta sa siyudad alang sa umaabot nga Batang Pinoy 2017 Mindanao leg.

Ang partisipante mamahimong moduwa sa indibiduwal ug team competitions.
"Each team must field at least three riders per category. The team who will get the highest accumulated points will be declared the champion," dugang ni Paholio.

Samtang ang rehistrasyon, alas 7 sa buntag magsugod, si 1992 Southeast Asian (SEA) Games gold medalist Dominic Carpio ang manguna sa criterium cycling clinic alang 10 hangtud 16 anyos nga i-endorso sa City Social Services Development Office.

Duna say ihatag nga premyo sa mga mananaug.

Alang sa dugang impormasyon, ikontak si Paholio sa numerong (0998) 993-1954 ug (0917) 687-7113. (ABM)