Basang bag-ong presidente sa Minproba

DAVAO CITY -- Si Boxing promoter-manager Jilson Basang sa MB Boxing Promotion gikan Carmen, Davao del Norte maoy bag-ong Presidente sa Mindanao Professional Boxing Association (Minproba).

Gihulipan ni Basang mao ang babayeng boxing promoter-manager nga si Yolanda Alfante sa Shock Punch Promotions, kinsa naka-base na ron sa Bacoor, Cavite.

Si Basang, civil engineer, maoy napili sa eleksiyon niadtong Mayo 13 atol sa katapusang adlaw sa 3rd Philippine Boxing Convention sa Marco Polo Hotel sa Davao City.

"I am humbled by the trust and confidence of our Philippine Games and Amusement Board Chairman Khalil Mitra and my fellow boxing promoters and managers, ring officials and boxers," ni Basang.

Si Basang ug ang laing bag-ong opisyal gi-induct dayon ni Games and Amusements Board (GAB) Chairman Abraham Kahlil “Baham” Mitra ug gi-witness nila GAB Commissioners Fritz Gaston ug Eduard Trinidad.

Ang beteranong boxing promoter-manager nga si Leonil Lazarito sa Leolet Boxing Stable gikan Valencia City, Bukidnon maoy Bise Presidente samtang si Lito delos Reyes sa ForePlay Promotions maoy sekretarya.

Si Rafael Jimenez sa RCJ Boxing Stable sa Iligan City ang treasurer samtang Joseph Delopere sa Ivan Josh Boxing Foundation sa Agusan del Sur ang auditor.

Si Wowie Lalanto sa WLS Boxing Stable nga gikan sab sa Valencia City maoy public relations officer.

Mga directors gilangkuban nila Iligan's Arnold Palafox (Northern Mindanao), Davao's Raides Neri sa MP Davao Stable (Davao Region), General Santos City's Jim Claude Manangquil sa Sanman Promotions (Soccsksargen) ug Surigao's Jo-Ay Lopez (Caraga Region).

Gipahayag ni Basang nga sugdan dayon niya ang pagbag-o sa kaayohan sa mga Pinoy boksidor.

Gusto niya nga isunod ang kabag-ohan gihimo ni Chairman Mitra nga base sa mandato ni President Rody Duterte. (PR)