Rodriguez mihari sa 2017 Kopiat Swim Challenge

MABINI, Compostela Valley -- Ang pambato sa Babak, Island Garden City of Samal (IGACOS) nga si Fritz Jun Rodriguez maoy mihari sa Kopiat Swim Challenge sa 9th Summer Beach Sports Festival dinhi.

Ang maong tigi sa langoy matag tuig nang gihimo.

Ang 15 anyos mioras og 7 minutos ug 22 segundos aron mapildi ang defending champion Kyle Pajarito (7:23.41) sa 900-metre sa Kopiat island sa Beach View Resort, Mabini.

Nabulsa ni Rodriguez ang premyong P4,000 ug tropeyo samtang ikatulo si John Martin Yarra sa Davao nga mitala og 7:24.39.

Nabuak sab ni Rodriguez ang milabay nga tuig nga Kopiat swim records apan napakyas niya maapsan ang oras nga 6:46:45 nga gihimo ni Carlo Rodriguez sa IGACOS, Davao del Norte niadtong 2013.

Sa amateur category, ang Tagum City tankers ang midominar nga si John Wesley Cuevas, 16, mihuman og 7:51:25 gisundan nila John Marion Albano ug Jhon Whesley Cuevas kinsa parehong mitala og 8:00:00.

Sa 12 years old and below category, si Eryk John Omandam sa Tagum City malampuson nga nadepensahan ang titulo nga mirekord og 8:51:47 kontra Alteddy James Sumgoy (8:52:05) ug ikatulo si Blu Cabalete (8:52:79).

Ang Kopiat Swimming Challenge usa sa "major highlight" sa maong festival sa Compostela Valley sa Mayo nga nakadawat og award sa Department of Tourism ug Association of Tourism Officers of the Philippines sa 2010 search for tourism best practice-sports and wellness category sa provincial level. (PR)