Mga kanhi Palarong Pambansa player: ‘Athletes deserves better’

ANG mga Dabawenyo nga sila Rowelyn Joy Acedo, Austin Jacob Literatus ug Ella Grace Moulic mihatag sab og komento kabahin sa delegado sa Davao Region Athletic Association (Davraa) nga nangatulog sa karton, tungod sa kakulangon og mattresses pag-abot nila sa probinsiya sa Antique alang sa Palarong Pambansa 2017.

Si UAAP chess gold medalist Moulic, pambato sa De La Salle University (DLSU) miingon, “athletes deserves better kay gina-present nila ang region. Maapektuhan man god ang self-esteem, makawala og morale” atol sa Davao Sportswriter Association (DSA) Forum sa SM City Annex kagahapong adlawa.

Bahin ni UAAP chess gold medalist, DLSU’s 5th year Acedo nga dugay na kini nga isyu ug angay nang aksyunan, “mahatagan na dapat og action kay maka-apekto gyud sa dula sa mga bata, kung di sakto ang tulog di maayo ang performance.”

Gani nakasinati matud pa si Acedo niini, “naka-experience pod mi dati, matulog sa lingkuranan nga naay karton pero tung sa Pangasinan kay naay airbed, nag-champion mi ato nga panahon. Mas advantage gyud kung naa.”

Mao sab ang paglantaw ni Fide Master Literatus, UAAP gold medalist sa National University, “mas nindot gyud kung maayo ang tulganan. Naa pod sa uban coach kung unsaon pagdala sa team nga ikaayo.”

Ang tulo ka mga kanhi Palaro players mihatag og dungog ug medalya sa Davao Region.

Luyo niini, mitambag ang mga UAAP gold medalist sa mga pambato sa Davao nga magpokus sa pagsungkit og bulawang medalya sa torneyo.

Sulti ni Moulic, “Keep themselves motivated, mag-focus na lang sa game, di na lang huna-hunaon ang mga trials.”

Sayo niini, gipahayag ni Department of Education Davao Region spokesperson Jenielito "Dodong" Atillo nga gihatagan na og 300 mattresses niadtong Lunes ug duna pay moabot alang sa 600 Davraa delegates.