Davao Sepak boys ug girls wa pay pildi

MATI, Davao Oriental - Padayon sa pagbansiwag ang Davao Sepak Takraw tim sa elementary boys ug secondary boys and girls sa nagpadayong Davao Region Athletic Association (Davraa) 2017 sa lain-laing venue sa Mati City.

Duna nay duha ka daug ang Davao elementary boys ubos ni Coach Ronnie Dayigdigan diin una nilang gipildi ang Davao Del Sur sa iskor 21-5 ug 21-9 didto sa Tagawisan Elementary School covered court.

Sa ika-duhang duwa, hapit mapakyas human nga naglisud sa unang set kontra sa Island Garden City of Samal (Igacos), 21-13 ug 21-5 ang team.

“Sa first set, medyo naglisud kay wala pa nakuha sa mga bata ang rhythm pero human sa among time-out naka-adjust na sila. Hopefully, magpadayon ang among pagdaug hangtud sa championship,” ingon ni Dayigdigan.

Sunod nila nga makaharong ang Davao Occidental apan kumpiyansa si Dayigdigan nga modaug.

Ang mga pambato niya gikan sa Josefa Elementary School boys players mao sila Rogin Lapaz, Stephen Dave Hilayco, Ivan Dale Tanduyan ug Mark Nave Amucay.

Sa Clergy Covered Court, midaug ang Davao secondary boys kontra Igacos sa parehong event, 21-14 ug 21-12 ug sunod nilang maka-atbang ang Davao del Norte samtang sa babaye, gipalukapa nila ang Davao del Norte, 21-14 ug 21-17 didto sa GSP Covered Court dayon sundan kini sa ilang pagharong sa Panabo City.