Bulawan sa shot put

MATI, DAVAO ORIENTAL – Naangkon sa pambato sa Davao Del Norte ang unang bulawang medalya sa pagsugod sa Davao Region Athletic Asscociation (Davraa) 2017 sa Mati Sports Complex niadtong Lunes, Marso 20.

Si Francis Camacho, 12, estudyante sa Grade 6 sa Davao del Norte Mabuhay Kapalong Elementary School, kinsa midaug sa elementary boys shot put event human miitsa og gilay-on nga 9.56 metros.

Ika-duha si Kevin Casot sa Davao Occidental nga mitala og 9.15 metros ug naka-bronseng medalya si Christian Partido sa Tagum City nga mirekord og 8.26 metros.

Gipahayag ni Francis nga ika-upat sa lima ka anak nila Rublita, Overseas Filipino Worker sa Kuwait ug Rey nga mipanaw na, nga di siya katuo nga siya ang midomina sa maong event.

“Natingala ko nga first ko kay tan-aw nako hinay akong paglabay,” sa pakighinabi niya human sa duwa.

Dugang pa: “Last year kay ikawalo lang ko, mga 6 meters lang kutob, ang akong kauban ang naka-gold pero graduate naman siya, naningkamot pod ko.”

Sa kadaugan, siya ang morepresenta sa Davraa team sa umaabot nga Palarong Pambansa karong Abril 23 hangtud 29 didto sa Antique.

“Excited na kaayo ko (Palaro), practice og maayo taga-adlaw gyud.”

Sunod event niya nga apilan mao ang Discuss throw ug javelin throw karong Martes.

“Dili ko sigurado kay kusog akong kauban diri si Erwin James Eluba, tan-awon lang ani.”

Niadtong Dominggo, gibuksan ang matag tuig nga torneyo.

“I encourage the athletes to not only the Palaro but most tried of higher excellence like play for the national team,” matod ni Philippine Sports Commission Commissioner Charles Raymund Maxey sa iyang mensahe.