Pillbox mibusikad duol sa kampo sa militar; 1 angol

MAGUINDANAO -- Usa ka tawo ang naangol sa dihang mibusikad ang pillbox duol sa headquarters sa sundalo alas 7:02 sa gabii niadtong Lunes.

Matud ni Maguindanao Police Provincial Office director, Senior Superintendent Edwin Buenaventura Wagan nga duha ka wala mailhing lalaki ang miitsa og pillbox sa Crossing Awang, Datu Odin Sinsuat sa nahisgutang probinsiya, 50 metros ang gilay-on sa entrance gate sa headquarters sa 6th Infantry (Kampilan) Division, Philippine Army.

Ang pagbusikad miangol kang Cherry Joy Patriarca Harayo, balut vendor ug nagpuyo sa Barangay Awang, Datu Odin Sinsuat.

Mga miitsa sa pillbox daling miikyas aron nga di maabtan sa mga awtoridad.

Samdan si Harayo human maigo sa mga tipaka sa pillbox.

Hinuon, nadala gilayon sa mga sundalo ug pulis ngadto Cotabato Regional and Medical Center (CRMC) ang biktima ug anaa na kini sa luwas nga kahimtang.

Daghan ang nagtuo nga posibleng pagpanghuraw lamang sa mga dautang pundok ang pagpang-itsa og pillbox duol sa kampo sa militar.

Ang kapulisan sa Datu Odin Sinsuat Municipal Police Station padayon nga nag-imbestiga sa hitabo. (Edgar E. Fuerzas)