Mitan-aw'g 'Probinsyano' gipusil

DIGOS CITY -- Patay gilayon ang usa ka drayber og habal-habal human gipusil sa wa mailhing suspek didto sa dalang Bonifacio, Barangay Poblacion Dos, alas 8 sa gabii, Lunes.

Giingong nagtan-aw lang og teleserye nga "Probinsyano" didto sa iyang balay ang biktima sa dihang nahitabo ang pagpamusil.

Ang kapulisan nag-ila sa biktima nga mao si alyas Nestor Paulino Villaflor, 52, ug molupyo sa lugar.

Naabtan pa sa Sun.Star Superbalita nga naglunang sa kaugalingong dugo ang biktima human naigo sa ulo.

Mga nakasaksi sa krimen nagbutyag nga usa ka lalaking nakasul-ob og kolor itom nga t-shirt ang nagdali pagpalayo sa lugar human nabati ang malanog nga buto.

Wa na madala sa bay tambalanan ang biktima human gilayong gibawian sa hinulaman niining kinabuhi.

Miresponde sab dayon ang mga sakop sa Scene of the Crime Operatives ug gisusi ang kalibre sa armas nga gigamit sa suspek.

Sumala sa kapulisan nga wa malambigit sa ilegal nga druga ang biktima mao nga dako ilang panaghap nga personal nga bangi ang nahimong pabilo sa krimen.

Gisubay na sab sa kapulisan ang hungihong nga nakadawat og bahad sa kinabuhi ang biktima pipila ka adlaw una nahitabo ang pagpamusil nga posible maoy motumbok aron nga mailhan ang mga suspek. (OBD)