Mga bata ipatuli sa PRO-Davao

MOPAHIGAYON og outreach program ang Police Regional Office (PRO)-Davao karong Abril 25 didto sa Datu Salumay, Marilog District, dakbayan sa Davao.

Ang maong aktibidad kabahin sa programa sa kapulisan sa rehiyon karon bakasyon nga ilang mapaabot sa lagyo nga dapit ang ilang mga serbisyo.

Sumala ni PRO-Davao spokesperson Chief Inspector Milgrace Cajes Driz nga mokabat 100 ka mga benepisyaryo ang makahimulos sa libreng Medical and Dental Mission.

Mga serbisyo mao ang operation tuli, dunay ibot sa ngipon, medical check-up, consultation ug medical distribution.

Manghatag sab sila og oral hygiene ug pneumonia vaccination diin na say eye check-up ug manghatag sila og mga reading eye glasses nga gipangunahan sa Rotary East.

Mang-apud-apod sab sila og mga school supply aron andam na ang
mga kabataan sa ilang mga gamit pag-abli sa klase.

Gawas niini, modalit sab sila og serbisyo nga gupitan, manicure/pedicure services diin lingawon sila sa usa ka Magic Show nga pangunahan ni Senior Police Officer 1 Jaime Franz Senarillos ug ang paglingaw sa selfie uban sa Mascot sa Philippine National Police. (JPC)