3 misukol sa pulis gitodas

PARANG, Maguindanao -- Tulo ka tawo ang natodas sa operasyon sa kapulisan batok sa mga wanted person alas 11:45 sa buntag niadtong Lunes.

Gibutyag sa hepe sa Parang Police nga si Superintendent Ibrahim Jambiran nga gironda nila ang gitagoan nila Abib Sarosong, Acero Kibab ug Todto Pangalian didto sa Barangay Calawag, Parang.

Apan misukol ang mga nahisgutan sa mga pulis hinungdan nga nagkapinusilay hinungdan sa ilang kamatayon.

Narekober sa mga pulis gikan sa mga napatay ang duha ka kalibre .45 nga pistola, mga bala ug usa ka motorsiklo.

Mga napatay giingong nalambigit sa pagpamaligya og ilegal nga druga, gun for hire, murder ug frustrated murder.

Padayon nga gihimo ang imbestigasyon sa kapulisan sa Parang Municipal Police Station ilabi na ang uban pang kaso nga gikalambigitan sa mga suspek. (Edgar E. Fuerzas)