P350 mil marijuana gibaligya sa Davao

MOBALOR sa P350 mil ang pinaugang dahon sa marijuana ang nakumpiska sa mga sakop sa Buhangin Police Station atol sa gilusad nga buy-bust operation Dominggo sa gabii, April 15, didto sa Ladislawa Road, Buhangin Proper, Davao City.

Gilusad ang operasyon human nadawat sa Buhangin Police Station ang impormasyon nga dunay mobaligya og mga gipang-repack nga marijuana.

Giingon nga sakay sa Kia-Pride Seadan ang mga suspek nga sila Karl Michael Obguia Tantano, 29, ug Katrina Osorio Tantano, 28, nagpuyo sa Deca Esperanza, Barangay Tigatto, Buhangin District.

Dihang nahiringan sa lalaki nga suspek nga pulis ang mipalit kanila, mipaturatoy kini'g padagan sa sakyanan human mikagar ang pagpusil niya sa mga pulis gamit ang iyang .38 nga revolver nga dunay upat ka mga buhing bala.

Giniyutralisa ang suspek nga lalaki kinsa naigo sa tiil mao nga gidala sa ospital samtang ang asawa niini gikustodiya sa kapulisan.

Nakuha gikan nila ang 91 ka mga pakite sa pinaugang dahon marijuana ug tulo ka bandol nga gilukot sa Manila paper lakip na ang sakyanan nga ilang gigamit.

Nakuha sab ang mga marked money ug mga drug paraphernalia.

Kasamtangan nga gitambalan ang lalaki nga suspek samtang ang asawa niini gibalhog na sa selda sa Buhangin.

Giandam na karon ang kasong pagsupak sa Republic Act 9165 kun Comprehensive Dangerous Drug Act of 2002 didto sa korte. (Jeepy P. Compio)