2 patay, 8 angol sa bangga

DUHA ang patay samtang walo ang angol human nagbangga ang Mindanao Star Bus ug usa ka pick-up alas 8 sa buntag kagahapon, April 16, didto sa Davao-Cotabato Road ug Digos-Diversion Road, Brgy. Cogon, Digos City.

Dead on the spot ang drayber sa Ford Ranger pick-up nga si Leo Compacion Onting, samtang nakabsan sab sa kinabuhi pag-abot sa ospital si Madeline Onting, 36.

Subay sa report gikan sa Police Regional Office (PRO) 11 nga nalawig ang pick-up nga gimaneho sa biktima gikan sa Crossing Kapatagan padung na unta sa Davao City.

Dihang pag-abot duol sa Cor Jesu College ug sa Shell Gasoline Station wala na nakabig pa ang manubela sa pick-up ug nadiretso kini sa kasugat nga Mindanao Star Bus nga gimaneho ni Jessie Magusara Sedoriosa.

Wa na mahitsura ang pick-up ug dugoan ang mga pasahero nga sila Nicole Compacion, 17; Angely Compacion, 20; Rosel Compacion, 40; Elma Compacion, 42; Gabriel Compacion, 6; KC Compacion, 13; Sofia Onting, 11; ug Madel Onting, 8.

Ang mga nahisgutan padayong gipangtambalan sa Davao del Sur Provincial Hospital samtang ang duha nga namatay anaa sa Padilla Labja Funeral Parlor.

Sa kasamtangan gibalhog na sa prisohan ang drayber sa bus kinsa nakatakdang pasakaan og kasong Reckless Imprudence Resulting to Homicide with Double Serious Physical Injuries and Damage to Property. (Jeepy P. Compio)