PRO-Davao: Way makalusot nga armas ug private armies

GIPANEGURO sa Police Regional Office (PRO)-Davao nga walay mga kaso sa loose firearms ug mga Private Armed Group (PAGs) sa tibuok rehiyon onse samtang nagsugod na ang election period sa Sangguniang Kabataan (SK) ug Barangay elections niadtong Sabado.

Sumala ni PRO-Davao spokesperson Chief Inspector Milgrace Cajes Driz nga usa sa kamandoan ni PRO-Davao director Chief Superintendent Manuel Gaerlan ngadto sa tanang station commander ug mga provincial chief of police nga mopahigayon og hugot nga mga checkpoints sa ilang area of responsibility (AOR).

"All stations must set up COMELEC checkpoints daily and will inform their COMELEC provincial election supervisors sa mga nanggihitabo," ingon ni Driz.

Nakigkoordinar sab ang PRO-Davao sa kasundalohan ug Philippine Coast Guard (PCG) aron dunay mobantay sa kadagatan gumikan mamahimo kining maagian sa dautang elemento.

"Naa tay coordination with the AFP and Philippine Coast Guard under the direction of the Comelec," dugang ni Driz.

Padayon ang kapulisan sa rehiyon sa pagpatuman sa mga balaod, ordinansa ug mga Comelec resolutions aron maseguro nga malinawon ang SK ug Barangay elections.

Hinuon, nahimong malinawon sa kinatibuk-an ang unang adlaw sa election period labi na sa filing sa Certificate of Candidacy (COC) niadtong Sabado.

"Generally peaceful ang PRO-11 (Davao) on the first day sa implementation sa election period labi na sa filing sa COC," sumpay ni Driz.

Sa kasamtangan, padayong gisubay sa PRO-Davao ang mga dapit nga anaa sa elections watchlist areas sa nakalabay nga mga eleksiyon kung matawag o makonsidera pa ba kining election hotspots. (JPC)