Suspetsadong Indonesian terrorist giposasan

TACURONG CITY -- Usa ka Indonesian national ang nadakpan sa mga awtoridad alas 2:00 sa hapon niadtong Martes didto sa probinsiya sa Sultan Kudarat.

Ang maong langyaw gisuspetsahan nga usa ka terorista ug giila nga si Mushalah Somina Rasim, nailhan sab sa ngan nga alyas Abu Omar, 32, minyo ug nagpuyo sa Palimbang sa nahisgutang probinsiya.

Gibutyag ni Sultan Kudarat Police Provincial Office director, Senior Superintendent Raul Supiter nga nadakpan si Abu Omar sa hiniusang puwersa sa kapulisan sa Palimbang Municipal Police Station ug 1st Marine Brigade Landing Team.

Nadakpan ang suspek duol sa kanhi nga kampo sa terorista nga Ansar Al-Khilafa Philippines.

Giingong si Omar maoy nagbansay sa mga sakop sa Bangsamoro Islamic Freedom Fighters, Maute Terror Group ug Abu Sayyaf sa paggama og bomba.

Nasayran matud pa nga miyembro sa terorista nga Jemmaah Islamiyah si Omar nga nakig-alayon sa mga local terrorist sa Mindanao.

Walay mga dokumento ang langyaw sa iyang pagpuyo sa Palimbang ug ilegal nga misulod sa nasud.

Gipailawom siya og hugot nga pagsukit-sukit sa mga awtoridad sa probinsiya. (Edgar E. Fuerzas)