Bansalan trail sa Mt. Apo abrihan na?

BANSALAN, Davao del Sur -- Gitigum na sa lokal nga kagamhanan ang mga porters sa lungsod aron makaandam sa pagdagsa sa mga climbers nga moadto sa Mt. Apo sa Semana Santa.

Kini human nga gisulti ni Mayor Quilin Sarte nga abrihan nila ang Bansalan Trail apan ang entrance fee naa na sa P1,500.

Gikinahanglan nga motuman ang mga climbers sa mga gidili sa lokal nga gobyerno ug sa Department of Environment and Natural Resources (DENR) ilabi na ang paggamit og kalayo aron nga magluto gamit ang kahoy.

Hugot sab nga gidili ang pagkatulog sa peak sa Mt. Apo mao nga gikinahanglang mobalik sa base camp nga gitugot ang pagpahulay sa mga climbers.

Gipasabot sa lokal nga kagamhanan nga ugaling mosaka sa peak sa bulkan angayang mobalik ra sab dayon sanglit dili pakatulgan ang dapit.

Nasayran nga ang Bansalan Trail lamang ang wa masunog human miulbo ang kalayo sa bulkan atol sa Semana Santa niadtong 2016.

Apan hingpit lamang matugtan ang pagsaka sa mga climbers ugaling mahuman karong adlawa ang tigum sa lokal nga gobyerno tali sa Protected Area Management Board (PAMB).

"Amoa pang i-defend sa PAMB kon nganong abrihan nato ang Bansalan Trail aron makatabang sab sa atong turismo." (OBD)