3 kapitan, 8 kagawad naa sa narco-list

Jeepy P. Compio

BISAN gipakusgan sa gobyerno ang kampanya batok ilegal nga druga, migula gihapon ning bag-ong narco-list ni Pangulong Rodrigo Duterte nga dunay walo ka mga barangay kagawad ug tulo ka barangay kapitan ang nalambigit sa druga ug giingon nga mga adik sa Davao Region.

Kini ang gibutyag ni Philippine Drug Enforcement Agency (PDEA) Davao director retired Senior Superintendent Antonio Rivera human gigunitan na sa Pangulo ang bag-ong listahan sa mga politiko nga nalambigit sa druga.

Sumala ni Rivera nga kini ang ilang gisubay karon aron ilang masikop ang mga nahisgutan ug kung mahimo ilang malimpyo ang ilang mga pangalan kung nagtuo sila nga kabahin lamang kini sa pagpangdaut labi na kay hinangat na ang eleksyon sa barangay.

Sa talaan sa PDEA dunay usa ka opisyal sa barangay sa Davao City, tulo sa Davao Oriental, tulo sa Davao del Norte, usa sa Davao del Sur nga naa sa Digos City, ug tulo sab sa Davao Occidental.

Ang PDEA mohimo og beripikasyon dayon, mohimo og hugot nga pagpaniid sa mga nahisgutan, apan kung masuta nga nagabaligya sila, diha na nila ipailawom sa buy-bust operation.

Giingon sa PDEA nga andam sila kung mo-request ang Commission on Elections nga ipailawon sa drug test ang mga opisyales sa barangay ug kadtong mga mokandidato pa karong eleksyon aron masuta kon sila mga adik.