Mga NPA nasiplatan sa Magsaysay, Matanao

MAGSAYSAY, Davao del Sur -- Daling nagtaas og alerto ang kapulisan sa lungsod human gitaho sa intelligence community nga anaa sa pipila ka mga barangay sa lugar ang presensiya sa mga rebeldeng New People's Army (NPA).

Sumala sa taho nga unang nasiplatan ang grupo sa Committee Front 72 ilawom ni Ka Semoin, didto sa Barangay Bala, alas 11:30 sa buntag niadtong Dominggo.

Laing grupo sab sa mga rebelde ang nasiplatan sa mga Barangay Savoy ug Asinan sa silingang lungsod sa Matanao, banda alas 4:00 hapon sa samang adlaw.

Gibutyag ni Senior Superintendent Samuel Gadingan, police provincial director nga nakataas na ang ilang alerto sanglit nagkaduol ang anibersaryo sa rebelde sa Marso 29.

Hayan nagplano og pagpanulong ang mga walhong komunista sa mga detachment sa militar ug istasyon sa kapulisan mao nga hugot nga seguridad sa mga lugar nga ilang gipatuman.

Samtang, kapin kon kulang 20 ka mga armado ang nasiplatan didto sa Sitio Labidangan, Barangay Upper Bala, alas 4:00 sa hapon, Lunes.

Giingong sakop nila Kumander Brix ug Borjak ang maong grupo kinsa miawhag sa mga molupyo nga mosupak sa pagbutang og detachment sa militar sa lugar.

Hinuon, nakig-alayon na ang kapulisan ngadto sa kasundalohan aron mapugngan ang dautang tumong sa mga rebelde.

Dako sab ang ilang pasalamat sa katawhan nga wa na mosuporta sa kalihukang komunista sanglit mas dali nang makaabot kanila ang mga impormasyon. (OBD)