Managlahing reaksyon sa pagsibog sa Barangay, SK eleksyon

MALIPAY kadtong mga opisyal barangay nga dunay mga sekretong ilegal nga buhat gumikan makapadayon sila tungod sa pag-uktaba sa House committee sa Barangay ug Sangguniang Kabataan (SK) elections karong Mayo 14, 2018.

Kini ang gibutyag ni Barangay 9-A Poblacion Captain Roderico “Tata” Llubit gumikan alang niya dayag nga maghudyaka ang mga kapitan nga dunay dautang intensyon sa ilang pangatungdanan.

Si Llubit nagbutyag, nga di angay mabalaka ang mga opisyal sa barangay nga basin unya mailisdan sila, diin mosalig lamang gumikan dako gihapon ang higayon nga sila ang botaran sa katawhan sa ilang barangay kung mihimo sila og kaayohan sa iyang mga lumulopyo.

Sa kabahin ni kanhi Barangay 35-D, Kapitan Marlon Balite, kinsa board of director karon sa Philippine Charity Sweepstakes Office (PCSO), mas maayong gilugwayan ang Barangay ug Sk elections aron makadesisyon pa ang mokandidato nga haum ba kaha sila sa ilang posisyon nga daganan.

Sa laing bahin, si Barangay 76-A Bucana Kapitan Rolando Trajera nagbutyag sab nga buot na niyang mag-eleksyon karong Mayo aron mahuman na ang taas nga paghulat sa katawhan.

Giingon niya nga mas maayo nga mahukman dayon pinaagi sa eleksyon kung kinsa ang angay nga magpabilin sa posisyon sa pag-alagad sa barangay.

Si Barangay 22-C Poblacion Kapitan Eduardo Milliondaga nagbutyag sab nga maayo alang sa mga opisyales sa barangay kay taas-taas pa ang ilang panahon.

Apan, suma niya, di kini maayo alang ngadto sa mga tawo nga buot mokandidato sa umaabot nga barangay eleksyon. (JPC/AD)