CADAC: Narco-politicians angay ibulgar sa publiko

SA PAGPAGULA sa bag-ong “narco-list” nga gigunitan karon ni Pangulong Rodrigo Duterte, nagtuo ang Davao City Drug Abuse Council (CADAC) nga duna gayuy mga opisyal sa barangay ang nalambigit sa gidiling druga.

Sa pakighinabi sa mga tigbalita kang CADAC researcher Connie Domag, di suma nila makompirma gumikan wala silay kopya sa bag-ong listahan nga anaa sa Pangulo, apan dako ang purohan nga dunay mga opisyal sa barangay kung basehan ang gidaghanon sa mga mitahan sa kapulisan.

Gipanghinaut sa CADAC nga angayan lamang mahibal-an sa publiko ang mga pangalan nga anaa sa narco-list una paman matigayong ang filing sa certificate of candidacy (COC).

Gitan-aw sa CADAC nga walay kalapasan sa 'right to privacy' kung mabulgar sa Pangulo ang mga pangalan sa mga kapitan ug uban pang opisyal sa barangay gumikan puwede nila malimpyo ilang mga pangalan pinaagi sa pagpahibalo sa ilang tinuod nga kinabuhi ngadto sa kapulisan.

Sa kabahin sa Commission on Electons (Comelec) Davao Region, spokesperson Atty. Omar Samama nga maghulat sila og guidelines sa Central Office sa Comelec kung ipatuman ang pag-drug test sa mga mokandidato sa Barangay ug SK elections isip usa sa mga rekisitos sa ilang pag-file sa COC.

Wala pa hinuon gibutyag sa Philippine Drug Enforcement Agency-Davao Region kung dunay bay mga nalambigit nga mga opisyal sa barangay sa bag-o nga narco-list nga gigunitan sa Pangulo. (JPC)