Gipamatay sa ‘kulto’?

Jeepy P. Compio

GITUOHANG “kulto” ang naglalap sa kinatawo ug lubot sa mga baboy sa Sitio Langan, Barangay Coronon, Sta. Cruz, Davao del Sur, alas 3 sa kaadlawon kagahapon.

Kini ang gibutyag ni Marlyn Ybanez, 34, minyo ug nagpuyo sa maong dapit, kinsa nagsaysay nga duha sa iyang mga anay ang nangamatay.

Gibutyag ni Marilyn sa SuperBalita nga natingala nalang siya dihang patay na ang iyang duha ka anay ug sa iyang pagtan-aw, nabangag na ang lubot niini ug wala nay kinatawo.

Dako ang iyang pagtuo nga kulto ang mihimo niini sanglit wa sila nakadungog og tingog sa ilang baboy sa paghiwa niini, wa sab nakapaghot ang ilang upat ka mga iro nga naa ra sab duol sa tangkal sa baboy.

Sa unahan sab sa ilang barangay dunay say gikataho nga nangamatay nga baboy nga susama sab ang gidangatan nga wala nay lubot ug kinatawo.

Mga opisyales sa Barangay Coronon naniid sa ilang palibot aron masuta kung kinsa gayud ang naghimo sa hitabo.