Seguridad sa Davraa hugtan

ANDAM na ang puwersa sa mga awtoridad sa dakbayan sa Davao alang sa ilang pagbantay sa pagbukas sa Davao Region Athletic Association (Davraa) Meet 2018 karong Dominggo sa University of Mindanao (UM) Matina track oval.

Si Davao City Police Office (DCPO) director Police Senior Superintendent Alexander Tagum nagsulti nga ila nang gisugdan ang pagpakatap sa ilang mga personahe alang sa kalihukan karong Dominggo ug sa mga mosunod pa nga adlaw hangtud sa pagsira niini sa Pebrero 23.

Ila nang gihan-ay ang ilang security plan. Matud ni Tagum nga ilang gitunga ang ilang puwersa ngadto sa security clusters alang sa tanang lugar nga himoan sa paugnat sa kusog ug mga puy-anan sa mga atleta nga nahimutang sa Talomo, San Pedro ug Sta. Ana police station.

"So far so good," pasalig sa opisyal.

Sayo niini, si DCPO spokesperson Police Senior Inspector Ma. Teresita Gaspan nagkanayon nga gibanabana nga 8,000 ka mga law enforcers ipakatap aron nga maseguro ang kaluwasan ug seguridad sa mga delegado gikan sa nagkadaiyang mga probinsiya ug kasiyudaran. Kini naglakip sa mga pulis, sundalo, force multipliers ug uban pang mga law enforcement agencies.

Mga 7,000 ka mga delegado gikan sa 11 ka mga school divisions sa rehiyon gilauman nga makigtigi alang sa 21 ka sports competition.

Ang DepEd mialokar og 15 ka mga tunghaan aron nga magsilbing puy-anan sa mga mosalmot.

Mga mananaug sa maong kompetisyon maoy mahimong representante sa rehiyon alang sa Palarong Pambansa 2018 sa Vigan, Ilocos Sur.

Gilauman nga mga bisita sa pagbukas sa torneyo karong adlawa mao si boxing icon ug Senador Manny Pacquiao, Deppartment of Education (DepEd) secretary Leonor Briones, mga opisyal sa siyudad ug uban pang mga opisyal sa DepEd.

Ang DepEd miimbita kang Presidente Rodrigo Duterte apan wala pay kompirmasyon.