'Rubber mat' nga salog ibutang sa Osmeña Park ug sa Botanical Garden

TINGUHA sa lokal nga kagamhanan sa siyudad sa Davao sa pagpahimutang og "safety equipment" alang sa kabataan sa Osmeña Park ug Botanical Garden, nahimutang sa Marfori heights.

Si Davao City Environment and Resources Office-in-charge Engr. Marivic Reyes nagtug-an sa SunStar Davao kagahapon, Pebrero 14, nga ang "rubber matting" salog nga magprotekta sa kabataan gikan sa pagka-angol ibutang sa maong giila nga mga lugar.

Matud niya nga ang proseso sa pagpalit alang sa rubber mats nagpadayon pa.

Dugang ni Reyes nga posible ang rubber matting nga salog ma-instolar sa botanical garden mas dako ang mabutangan nga lugar itandi sa Osmeña Park.

Niadtong milabay nga Disyembre, si Davao City Mayor Sara Duterte-Carpio mismo nangulo sa pag-abli sa renovated side sa People's Park uban sa 360 metros nga rubber mat nga salog.

"We reconstructed the fun park area so that we can comply with the safety standard that is requirement for a children's playground," matud sa mayor sa iyang kanhi pamahayag. (Karina V. Cañedo)