Pahayag ni Trillanes girespeto sa DCPO

LUYO sa pagpagawas og istorya ni Senador Antonio Trillanes IV nga di luwas ang Davao City ug maoy pinaka-delikado nga lugar sa Pilipinas, girespeto kini sa Davao City Police Office (DCPO).

Atol sa AFP-PNP Press Conference kagahapon, Pebrero 14, gibutyag ni DCPO spokesperson Senior Inspector Ma. Theresita Plaza-Gaspan nga bugtong Dabawenyo ra ang makapamatuod nga luwas ang Davao City puy-an.

"Only Dabawenyos ang makasulti niini kay makita man nila unsa ka safety puy-an ang Davao City mao ganing naa tay slogan nga 'Davao, life is here' kay safety ta diri," ingon ni Gaspan.

Una niini, gideklara sa konseho ning siyudad nga persona non grata si Trillanes ug si New York-based philanthropist Loida Nicolas Lewis human sa ilang pamahayag nga "number one in murder, number two in rape and Davao City is the most dangerous city of the Philippines" sa iyang pagpamulong sa gawas sa nasud.

Nagbutyag sab si Gaspan nga kung dunay gibasehan si Trillanes sa iyang mga gipanulti, ipagawas kini ug pamatud-an sa senador.

Hinuon, andam ang DCPO nga mopagula og rekord ug ikompara sa ebedensya ni Trillanes kung matawag kini nga lehitimo nga ebidensya. (Jeepy P. Compio)