2 Cafgu nagsinuntokay sulod sa kampo, 1 patay

PIGCAWAYAN, North Cotabato -- Patay ang usa ka sakop sa Citizen Armed Forces Geographical Unit (Cafgu) human gipusil sa iya mismong kauban sulod sa ilang kampo alas 8:30 sa gabii niadtong Martes.

Giila ang biktima nga si Noel Sauldan, samtang ang suspek mao si Wilson Esonsa, pulos sakop sa Cafgu ilawom sa 38th Infantry Battalion, Philippine Army.

Gibutyag ni 602nd Brigade Chief Brigadier General Nolly Samarita nga nagkalalis sila si Sauldan ug si Esonsa gumikan sa personal nilang dumot.

Nagkabinayloay og mga mahait nga pulong sulod mismo sa ilang detachment sa Barangay Simsiman, Pigcawayan, nga miresulta sa pagsinumbagay.

Apan natumba si Esonsa gumikan dako og lawas si Sauldan, hinungdan nga gikuha niini ang iyang M2 US Carbine rifle ug gipusil si Sauldan.

Patay on the spot ang biktima nga nakaangkon og duha ka samad pinusilan sa lawas.

Gidakop dayon ang suspek sa iyang mga kauban ug gitunol ngadto sa kapulisan.

Gitakda nga pasakaan og kasong pagpatay si Esonsa tungod sa salaod nga iyang gihimo ngadto sa iyang kaubang Cafgu. (Edgar E. Fuerzas)