Gibiyaan kay gamay'g kinatawo

Jeepy P. Compio

DAW nahunlak ang kalibutan sa usa ka bana human iyang nasayran nga duna nay laing lalaki ang iyang asawa gumikan sa rason nga gamay ang kinatawo niini.

Sabado sa buntag, mipatim-aw sa buhatan sa Toril Police Station si Roland (apelyido gitago), 35, residente sa Bayanihan Street, Barangay Poblacion, Toril, Davao City, diin iyang gipa-blotter ang nagluib niyang asawa.

Subay sa blotter nga natala, giingong nadeskobrehan ni Roland pinaagi sa Facebook sa iyang asawa nga si Mariel nga duna kini'y tago nga relasyon sa usa ka Darwin, taga Mati City.

Matod pa ni Roland nga niadtong Enero 6, 2018, miangkon ang asawa niini nga aduna na kini laing lalaki ug buot na kining magkigbulag kaniya tungod sa kagamay sa iyang kinatawo.

Nadugangan ang kapungot sa bana human niadtong Pebrero 3, miangkon na sab ang iyang asawa nga aduna nay nahitabo niya ug sa iyang kabit ug didto nakita niya ang gipangita niini nga kinatawo.

Dangtan og tulo ka adlaw, milayas na ang iyang asawa sa ilang balay ug wa na kini mibalik ug gituohang nagtaban na sa iyang kabit.

Sumala sa bana nga bisan pa man sa pagbiay-biay sa iyang asawa sa iyang gamay nga kinatawo, ipakita gihapon niya ang iyang dako nga gugma sa asawa sa pagbalik niini sa ilang balay.