Bangsamoro Basic Law, federalism gilauman nga mapasar

BULUAN, Maguindanao -- Gilaumang mapasar na sa gobyerno ang Bangsamoro Basic Law (BBL) ug federalism, human sa malampusong pagpahigayon og forum alang niini sa probinsya sa Maguindanao.

Matod ni Maguindanao Governor Esmael Mangudadatu nga tumong sa maong panagtapok mao ang pagpahibalo sa katawhan mahitungod og federalism nga maoy gipanghingusgan ni President Rodrigo Duterte ug ang BBL.

Gisaysay usab sa maong forum ang kaayohan nga dala niini sa ilang lalawigan kong kini mapatuman sa hingpit.

Apan gihinaot ni Mangudadatu nga unta mas unang mapasar ang BBL una ang federalism.

Lakip na nanguna sa maong forum mao sila Secretary Amina Rasul Bernardo sa Philippine Council for Islam and Democracy, Pete Lavina sa Federalism Speakers’ Bureau, ug Department of Interior and Local Government Assistant Secretary for Plans and Programs Epimaco Densing III.

Samtang mipadayag usab sa suporta ang mga molopyo sa mitambong sa maong kalihukan ug ubay-ubay kanila uyon nga mas unahon ang BBL ug isunod ang federalism.

Mipadayag usab sa iyang pasalamat si Eeman Aljani, executive assistant ni Mangudadatu, sa mga mitambong, misuporta ug nakighiusa sa forum.

Gikatakdang i-resume karong adlawa ang maong forum ug ipadayon ang pagtuki kalabot sa BBL ug federalism.