Sattelite office sa Dasureco gipahimutang sa Bansalan

BANSALAN, Davao del Sur - Dili na mahago og adto sa layong opisina sa Davao del Sur Electric Cooperative (DASURECO) ang mga molupyo sa 25 ka mga barangay human nagsugod na pagdawat og transaksiyon ang ilang satellite office sud sa Bansalan Public Mall.

Gibutyag ni Romulo Camillo, Dasureco Mabama District Supervisor, nga susamang transaksiyon sa main office ug sa ubang buhatan sa Dasureco ang ginadawat sa ilang satellite office sud sa merkado.

Matud ni Camillo nga mahimong mobayad, magpa-reconnect ug uban pang transaksiyon ang ginadawat niini.

Dako sab og benepisyo alang sa mga molupyo sa lugar ang pagbutang og satellite office sa public mall kay dili na magpakyaw og mga traysikel ang mga buot mobayad.

Nasayran nga dako og gastuson ang usa ka konsumante aron mobayad sa ilang sub-office sa Km. 71, Matanao, Davao del Sur.

Alang ni Camillo, dili lang taga Bansalan ang dawaton sa satellite office sa maong merkado kay bisan mga taga lungsod sa Magsaysay, Davao del Sur duol na lang og padulngan.

Samtang, gibutyag sab ni Engr. Godofredo Guya, Dasureco general manager nga mas gipalambo pa sa Dasureco ang ilang serbisyo sa katawhan ug hapit na sab sugdan ang digital nga paagi sa pag-reading sa kilowatt hour sa mga kontador sa kabalayan. (Orlando B. Dinoy)