Revolutionary Government scammers dakpon

NAGBAHAD ang Department of the Interior and Local Government sa Davao Region (DILG-11) nga silotan ang pipila ka mga tawo kinsa nagpailang sakop sa DILG ug mangayog kuwarta gamit ang kampanya sa Revolutionary Government (RevGov).

Ang press release nga gipagula kagahapon sa DILG-11 nagsaysay nga nakadawat sila og daghang report labot sa mga grupo nga naglibut-libot sa mga barangay sa giingong kampanya sa RevGov diin nagpasalig nga lig-on ang ilang grupo ug gipaluyohan sa DILG.

Sumala ni DILG 11 regional director Alex C. Roldan nga ang mga nahisgutang scammers, miduol sa pipila ka mga barangay officials ug bisan sa mga politiko kinsa nangdani sa ilang grupo nga maoy giingong prayoridad sa listahan nga nanguna sa federal form of government ug bisan sa RevGov.

Dugang pa nga human sa ilang mga pagpasabot nga sila ang giingong mga lehitimong grupo, mangayo dayon sila'g salapi.

Si Roldan nagpasabot sa publiko nga ang maong buhatan walay opisyal nga pag-promotar sa RevGov ug ang DILG wala nagsuporta sa appointment sa mga barangay ug local officials nga mobalin ngadto sa federal.

Giingon sab ni Roldan nga wala nagapangayo og salapi ang buhatan alang sa giingong membership fees ug donations ingon man ang peke nga mga saad alang sa OIC appointment.

Tungod niini, ang Central Office sa DILG nagpagula na sab og advisory labot sa maong isyu gumikan sa padayong pagtaas sa ihap sa mga reklamo gikan sa mga local officials nga maoy target sa mga grupo.

"People should immediately report the group to the DILG for appropriate action," sulti ni Roldan. (Jeepy P. Compio)