Mitahan nga Kumander, gisubay pa sa kapulisan

ANG Police Regional Office sa Davao Region (PRO-11) nagdumili pa sa pagkompirma kung si Kumander Bobby nga sakop sa New People's Army (NPA) ang lalaking mi-surrender alas 11 sa buntag niadtong Lunes didto sa detachment sa Regional Mobile Force Batallion (RMFB) sa Barangay Kasilak, Panabo City.

Sumala ni Police Supt. Arnold Palomo, Force commander sa RMFB-11, nga ongoing pa ang ilang verification ug validation sa background sa lalaking nagpailang si Kumander Bobby sa Pulang Bagani Command (PBC 1).

Gawas sa paka-Kumander Bobby, nagpaila sab ang mitahan nga si alyas Bobmax ug alyas Ka Boging, nga nag-operate sa Paquibato District, Davao City kinsa nadestino niadto isip Supply Officer (SO) sa 2010, Political Officer (PO) sa 2015 ug giingong Political Instructor (PI) gikan tuig 2016 hangtud ning kasamtangan.

Ang kapulisan dugang nagduda human mitahan kini nga walay dalang bisan usa ka armas ug giingong di basta basta nga motahan si Roberto Rosete, alyas Kumander Bobby sanglit usa kini sa giilang mga high ranking officials sa CCP-NPA rason nga pabilin kini karong gisubay sa kapulisan.

Si Kumander Bobby ang commanding officer sa Sub-regional Committee 3 sa CCP-NPA Guerilla Front 54 nga nag-operate sa habagatang Mindanao.

Gisaysay sab ang mitahan nga igsuon niya si Ruditha Rosete Gaylawan ang nadakpan sa Calinan Police Station niadtong Marso 8, 2017 didto sa Barangay Sirib, Calinan, Davao City kinsa giingong maoy secretary general sa front committee 54.

Ang grupo ni Kumander Bobby ang giingong maoy responsable sa pagpangatake sa detachment sa Regional Public Safety Battalion (RPSB) didto sa Barangay Malitbog Panabo City niadtong Hunyo 23 ning tuiga nga gikamatay sa usa ka police sniper nga si Senior Police Officer (SPO1) Niño Moreño. (Jeepy P. Compio)