Kampo sa Cafgu girapido

MAGUINDANAO PROVINCE - Nakugang ang mga sibilyan sa buto-buto sa armas alas 9:20 sa gabii niadtong Lunes.

Sa taho gikan sa Tactical Command Post sa 601st Brigade, Philippine Army nasayran nga gipabuthan sa mga armadong grupo gamit ang mga tag-as nga matang sa armas ang detachment sa Citizen Armed Forces Geographical Unit (Cafgu), ubos sa 38th Infantry Battalion didto utlanan sa Mamasapano ug Datu Salibo sa probinsiya.

Abtik nga nakabantay ang mga sundalo ug Cafgu nga mibalos sa pagpabuto sa ilang armas batok sa mga rebelde.

Milungtad sa 15 minutos ang sinukliay og mga bala tali sa duha ka pundok. Miatras ang mga armadong kalalakin-an nga gitumbok nga mga miyembro sa Bangsamoro Islamic Freedom Fighters (BIFF) sa diha nga gipabuthan sila sa mga sundalo gamit ang 81 mm mortar.

Walay naangol o napatay sa mga Cafgu ug sundalo samtang dili matino sa mga rebelde ilawom sa grupo ni Kumander Bungos.

Sa kasamtangan nagpadayon ang combat clearing operation sa mga sundalo ug Cafgu batok sa BIFF sulod sa SPMS Box sa probinsiya sa Maguindanao. (Edgar E. Fuerzas)