Suspek sa lugos nasikpaw

MAWAB, ComVal Province -- Malampuson nga naaresto sa hiniusang puwersa sa kapulisan ang mag-uuma nga pinangita sa balaod sa Purok 3, Barangay Tuboran, alas 3:15 sa hapon, Martes.

Ang dinakpan giila nga si Jose Orias, 56, minyo, nagpuyo sa Purok 3, Barangay Tuboran, Mawab.

Base sa taho sa kapulisan, nasayran nga ang Trento Municipal Police Station (MPS) ug Criminal Investigation and Detection Group (CIDG) nakig-alayon sa Mawab MPS alang sa Manhunt Operation Charlie.

Si Police Chief Inspector Duane Francis Ducducan, hepe sa Mawab MPS, maoy nangulo sa pagsilbi sa orden de aresto batok sa suspek human nasiplatan sa mga tigpaniid ang nahimutangan sa suspek.

Ang pagdakop sa suspek nahisubay sa orden de aresto nga gipaguwa ni Executive Judge Dante Luz Viacrusis sa Regional Trial Court Branch 6, Prosperidad, Agusan del Sur tungod sa kasong Rape o pagpanglugos, ubos sa Criminal Case Number 7148.

Ang suspek giilang top 1 most wanted person sa Trento kinsa gikustodiya sa Trento MPS samtang naghulat sa mosunod nga mando sa korte. (Rockyben S. Catisay)