7 magsuong Maute napatay sa Marawi

COTABATO CITY -- Gikompirma ni Western Mindanao Command Chief, Lieutenant General Carlito Galvez nga napatay sa mga sundalo ang pito ka magsuong Maute sa Marawi City niadtong Mayo 23 hangtud Oktubre 23, ning kasamtangang tuig.

Kini ang gitug-an ni Galvez atol sa Regional Peace and Order meeting sa Autonomous Region in Muslim Mindanao (Armm) sa Cotabato City.

Samtang target karon sa manhunt operation sa militar ug kapulisan ang Senior Maute leader nga si Abu Dar.

Si Abu Dar usa ka ethnic Maranao nga miyembro sa sentral nga pamunoan sa kinauyokan sa Maute terror group nga mihulip kang Omar ug Abdullah Maute nga napatay sa militar panahon sa giyera sa Marawi City.

"Abu Dar can likely assume the leadership of the Maute terror group," matud ni Galvez ngadto sa mga miyembro sa RPOC, kon diin ang tsirman ni Armm Governor Mujiv Hataman.

Gikompirma sab ni Butig, Lanao del Sur Mayor Dimnatang Pansar nga nakadawat sab siya og taho nga napatay ang pito ka magsuong Maute sa Marawi Siege.

"Many of their leaders were killed during the conflict in Marawi City," pagklaro ni Pansar.

Si Pansar mao ang Presidente sa League of Mayors sa Lanao del Sur diin usa ka dakong hagit karon sa gobyerno mao ang subling katukoran sa Butig ug Marawi City gikan sa pagkaguba sa miulbo nga kagubot.

Nagkasabot ang mga opisyal sa RPOC-Armm nga gipangulohan ni Governor Hataman nga magtinabangay nga mabalik sa katilingban ang mga maayo nga Maute nga posibleng militante o kaha taga-suporta nga napugos lamang gumikan gihulga silang patyon sa mga terorista.

"We will not treat them as special people. We can only help them return to their communities but subject to coordination with the police and the military," segun ni Hataman.

Misulti sab si Vice Governor Haroun Al-Rashid Lucman nga daghanan sa pamilyang Maute ang dili konektado sa Maute Terror Group apan gidudahan ug gibiay-biay sa ilang komunidad.

"My daughter's classmate in medical school, whom we know is not a terrorist, has dropped out. She wants to return to school but could not because she belongs to the Maute clan," suma ni Lucman.

Gipatawag sab ni Hataman ang 39 ka Municipal Peace and Order Councils sa Lanao del Sur nga motabang sa mga pulis ug militar aron mapugngan ang pagpangrekrut sa mga Maranao sa local Islamic State-inspired group.

"There must be strong semblance of government in the municipalities. War is destructive. We have to prevent conflicts within our level first before we let the military come in. Our presence in the municipalities will help a lot," asoy ni Hataman.

Samtang gikompirma sab ni Lucman nga kadaghanan sa mga Municipal Mayors sa probinsiya ang mitabang aron madakpan si Abu Dar nga miikyas gikan sa Marawi City, uban ang iyang 40 ka sakop.

Gihagit ni Hataman ug Galvez ang tanan nga magtinabangay aron mapugngan ang dautang plano sa mga terorista sa rehiyon. (Edgar E. Fuerzas)