Mga Christmas party mi-arangkada na

DIGOS CITY - Iya-iya na og gimik ang mga nagkadaiyang organisasyon aron sayong saulugon ang Pasko nga puno sa kasadya ug kamaya pinaagi sa ilang Christmas Party.

Nalipay ang gatusan ka mga sakop sa Pantawid Pamilyang Pilipino Program (4Ps) sa siyudad sa Digos human gitambongan sa mga opisyal sa siyudad ang ilang gipahigayong Christmas Party niadtong Lunes.

Sumala ni Bise Mayor Rey Hermosisima nga angayan nga saulugon gyud nga puno sa kadasig ang Pasko kay talagsa ra kini sa usa ka tuig.

Sa maong adlaw, malipay sab ang matag usa kay daghan silang madawat nga mga pinaskuhan ilabi na gikan sa mga suod nga higala.

Dungan sa 4P's, nagsaulog sab og Christmas Party ang mga sakop sa Rural Improvement Center didto sa Women's Center nga gitambongan pa mismo ni Mayor Joseph Peñas.

Sumala ni Peñas nga mahinungdanong ipabati sa matag usa ang espiritu sa Pasko ug dili sab hikalimtan ang mga kabataan nga maoy angayang hatagan og kalipay sa maong adlaw.

Mihimo sab og Christmas Party ang mga Senior Citizen sa Barangay Zone 1 sa susamang adlaw kinsa dako ang kalipay human nakadawat og mga pinaskuhan gikan sa mga opisyal sa dakbayan. (Orlando B. Dinoy)