Pagpatay sa pulis magsilbi nga leksiyon sa uban

GISULTI ni Davao City Police Officer (DCPO) director Police Senior Superintendent Alexander Tagum nga ang pagpatay sa ilang personahe niadtong Lunes magsilbi isip leksiyon alang pa sa laing pulis nga mag-alerto ug magbinantayon sa ilang kaugalingong seguridad tungod sa hulga sa mga dautang tawo.

"This incident will also serve as a strong warning to all personnel of DCPO that they cannot afford to relax their personal security because then it will cost them their lives," butyag sa opisyal Martes.

Ang napatay nga pulis si Police Officer (PO3) Wilfredo Bansag Garol Jr., 34, minyo ug molupyo sa Rubber Village sa Calinan, Davao City, ug kasamtangang nadestino sa Baguio Police Station (PS11).

Siya gipusil-patay sa duha ka wala mailhing mamumuno mga 7:45 sa buntag, Nobyembre 13, sa Purok 5, Sitio Luman, Barangay New Valencia, Tugbok District, Davao City.

Ang biktima nakaangkon og daghang samad pinusilan sa lawas hinungdan sa iyang hinanaling kamatayon.

Subay sa taho sa pulis, giubanan sa biktima ang iyang asawa, magtutudlo, ngadto sa tunghaan apan sa dihang mibalik na siya aron nga magpaandar sa iyang XRM nga itom nga motorsiklo, duha ka wala mailhing lalaki nga misakay sa gimaneho niini nga motor ug pag-abot nila sa lugar, gipusil siya sa makadaghang higayon.

Gawas sa pagpatay, gidala sab sa mga suspek ang iyang service firearm ug motorcycle.

Mga suspek daling misibat ngadto sa wala matino nga lugar.

Ang DCPO misaad nga dalion ang pagsulbad sa kaso ug pag-ila sa mga suspek nga responsable sa pagpatay sa biktima.

"The death of PO3 Wilfredo Garol will be thoroughly investigated to identify those behind his treacherous killing," matud pa niya.

Dugang ni Tagum nga nga wala sila mahadlok sa insidente ug magpadayon sa ilang hugot nga security monitoring batok sa kriminal ug terorismo.

"It will not, however, deter our commitment in our relentless and intensified fight against all forms of domestic threats posed by communist terrorists or criminals," dugang pa niya. (JCR)