Simbahan gidauban; mga rebulto gipanamastamasan

COTABATO CITY - Gituohang grupo sa Bangsamoro Islamic Freedom Fighters (BIFF) ang nagsunog sa simbahan didto sa Barangay Labu-Labu, Shariff Aguak, probinsya sa Maguindanao.

Nahitabo ang pagpanunog alas 8:20 sa gabii niadtong Dominggo.

Sa taho gikan sa Maguindanao Police Provincial Office, nasayran nga gisulod sa BIFF, gipangulohan ni Esmail Abdulmalik nga mas naila sab sa pangalan nga alyas Kumander Abu Torayfe, ang simbahan sa San Isidro Labrador ug gisilaban.

Wala pa matagbaw ang mga terorista, ila pa nga gipangbuak ang mga rebulto sulod sa simbahan.

Miikyas mga suspetsado sa diha nga nakatimaho nga nagsingabot na ang mga pulis ug sundalo sa dapit.

Dali sab nga nahiabot ang mga bombero sa Shariff Aguak hinungdan nga wala makaulbo ang kalayo.

Ang maong buhat, gikondena ni Shariff Aguak Mayor Marop Ampatuan, nga dakong pagyaga-yaga sa tinuohang Kristiyano.

Andam sab nga mohatag og reward money si Maguindanao Governor Esmael "Toto" Mangudadatu sa mga tawo nga makatudlo sa mga suspek sa pagsunog sa simbahan.

Kapulisan sa Shariff Aguak Municipal Police Station padayon nga nagsusi sa maong hitabo.