Pulis gipatay sa 'riding-in-tandem'

Jeepy P. Compio

GIKONDENA sa Police Regional Office (PRO)-Davao Region ang pagpusil patay sa usa ka pulis alas 7:45 sa buntag didto sa Purok 5, Sitio Luman, Barangay New Valencia, Tugbok District, siyudad sa Davao.

Sumala ni PRO-Davao director Manuel Gaerlan nga usa ka "barbaric" nga hinimoan ang pagpatay kang Police Officer 3 (PO3) Wilfredo Garol, intel officer sa Baguio Police Station, nga gituohang hinimoan sa lawless armed groups (LAGs).

"I condemn the senseless and cowardly attack and killing of PO3 Wilfredo Garol by suspected LAGs," pamahayag ni Chief Superintendent Gaerlan. "He (Garol) was a good public servant, police officer and loving husband."

Nasayran nga naghatud lamang si PO3 Garol sa iyang asawa sa eskuwelahan nga gitudloan niini sa Barangay New Velencia ug dihang pagnaug na sa iyang asawa, samtang mopadagan na unta sa motorsiklo ang biktima, gitabangan kini'g pusil sa duha ka mga wa mailhing lalaki nga sakay sa motorsiklo.

"This act is a manifestation that the NPA (New People's Army) as well as other communist front organizations have no regard for HR (human rights) and IHL," sumpay sa pahayag ni Gaerlan kinsa gitumbok ang NPA nga maoy posibleng mihimo sa krimen.

Ang PRO-Davao nagmugna og Task Force aron maoy moimbestiga sa kamatayon sa pulis.

Gihaya na ang patay nga lawas ni Garol ug mipadangat og pahasubo ang iyang mga kabaro sa pagbisita sa haya niini.