Mga reklamo sa Dabawenyo atimanon

ANG lokal nga kagamhanan sa dakbayan sa Davao naglunsad niadtong Miyerkules sa Davao City Reports project, usa ka Facebook page ang nagtinguha sa pagdungog ug pagdawat sa mga reklamo sa mga Dabawenyo.

Ang Davao City Reports page nagtanyag og kombenyente ug direct web-based platform alang sa mga tawo nga magpahibalo sa mga opisyal ug ahensya labot sa ilang reklamo ug suliran ug ang gobyerno daling makaresponde ngadto nila.

Si Mayor Sara Duterte-Carpio, kinsa personal nga mianunsyo sa proyekto sa iyang Instagram ug Facebook accounts, nagsulti nga ang Davao City Reports page usa ka opisyal nga complaints page sa Davao City local government unit.

Ang mayor nagseguro nga ang pagkatawo sa mga magreklamo protektahan sa gobyerno.

“It has come to our attention that people tag my personal social media accounts for their complaints and issues in Davao City," suma niya.

"Unfortunately, I do not open my notifications and did not download (an) FB messenger, these tags remain unattended. To correct this, the City Government opened an official complaints page," dugang niya.

Usa ka oras human gianunsyo, ang Davao City Reports page nakadawat og 200 ka mga private messages sa Facebook.

Mga Dabawenyo maka-email sa ilang reklamo sa davaocityreports@gmail.com.

Mahimo sab nga mobisita sa Facebook page https://www.facebook.com/davaocityreports. (PR)