Isis sa Davao Region gibantayan

DAVAO DEL SUR -- Mas gipalig-on pa sa Davao del Sur Police Provincial Office (DSPPO) ang seguridad sa tanan nilang istasyon aron di malutsan sa mga teroristang grupo nga giingong ania sa Davao Region.

Nakig-alayon ang kapulisan sa mga tropa sa militar aron palapdan ang intelligence network batok sa mga dautang elemento nga buot manabotahe sa gobyerno.

Gibutyag ni Senior Superintendent Samuel Gadingan, police provincial director, nga angayang magbinantayon kanunay ang publiko ug motaho dayon sa kapulisan kon adunay mamatikdan nga katingad-ang lihok.

Nakadawat og impormasyon ang kapulisan nga adunay 500 ka mga sakop sa Islamic State of Iraq and Syria nga nakasud sa Davao Region ug gitakdang mohimo og pagpanabotahe sa kahapsay'g kalinaw.

Gumikan niini, mas hugot nga alerto ang gimando sa DSPPO sa tanang istasyon aron di makasud sa probinsiya.

Samtang si Gadingan nagmando sab sa tanang hepe nga mag-doble alerto aron di makalusot sa ilang plano ang mga rebeldeng New People's Army nga kanunay nang nanghulga sa seguridad. (OBD)