4 NPA misurender sa militar

TACURONG CITY -- Upat ka miyembro sa New People's Army (NPA) ang misurender ngadto sa militar alas 10:30 sa buntag niadtong Miyerkules, Oktubre 11, sa probinsiya sa Sultan Kudarat.

Giila ang mga rebelde nga sila Beboy Mek, 24, Arjohn Blagan, 23, Osing Samandal Kuyan, 21, ug Robert Balabagan, 21, mga molupyo sa Barangay Titulok, Bagumbayan sa maong probinsiya.

Ang upat ka NPA giingong mga sakop sa Platoon Myphone sa Guerilla Front Committee 73.

Gibutyag ni 6th Infantry (Kampilan) Division Public Affairs Chief, Captain Arvin Encinas nga mitahan sa kaugalingon ang mga nahisgutan ngadto sa puwersa sa 33rd Infantry Battalion (IB), Philippine Army ug 57th IB sa pagpanguna ni Colonel Harold Cabanoc.

Dala sa mga rebelde sa ilang pagsurender ang duha ka M16 Armalite rifles, usa ka M1 Garand rifle, usa ka AK-47 rifle ug mga buhing bala.

Gikanayon ni 33rd IB Commander, Colonel Harold Cabunoc nga misurender ang mga NPA sa tabang sa mga barangay opisyal.

Gipamahayag ni Beboy Mek nga sila misurender gumikan gusto na nilang manginabuhing malinawon uban ang ilang mga mahal nga pamilya.

Dili na sab nila masabtan ang ilang gipakigbisugan gumikan mga lider lamang sa mga komunistang pundok ang naadunahan samtang sila nag-antos nga halos walay gikaon sa pagtago-tago sa kabukiran.

Giandam na sa gobyerno ang paghatag og tabang sa mga NPA nga mibalik sa sabakan sa balaod. (EEF)