Sabungero gipatay sa NPA sulod sa sabongan

MAGPET, North Cotabato -- Patay ang usa ka sabungero human gipusil sa giingong mga sakop sa New People's Army (NPA) sulod mismo sa sabongan.

Nahitabo ang pagpamusil patay sa biktima nga si Bebs Nero, 41, minyo ug molupyo sa Barangay Balite, Magpet alas 2 sa hapon niadtong Lunes.

Gibutyag ni North Cotabato Police Provincial Office director, Senior Superintendent Jonathan Tangonan nga naglingkod ang biktima sa iyang motorsiklo sulod sa sabungan sa Barangay Balite.

Apan kalit lang giduol sa duha ka wala mailhing lalaki ug gipusil gamit ang kalibre .45 nga pistola.

Hikabsan gilayon sa kinabuhi ang biktima human makaangkon og samad sa ulo ug likod nga bahin sa lawas.

Samtang mga mamumuno abtik nga miikyas dala ang motor ni Quino paingon sa bukiron nga bahin sa lungsod.

Giingon sakop sa Sparrow Unit sa Guerilla Front Committee 53 sa NPA, ubos ni Kumander Bulldozzer ang gitudlo nga mipatay sa biktima nga giingon nga tiktik (asset) sa militar.

Apan hugtanon nga gipanghimakak sa pamilya sa biktima nga asset sa 39th Infantry Battalion sa Philippine Army si Quino.

Dugang pa sa pamilya nga biktima lang si Quino sa sayop nga akusasyon.

Hinuon kapulisan sa Magpet Municipal Police Station padayon pa sa ilang imbestigasyon sa hitabo. (EEF)