Kanhi drug surrenderee namasahero, gipatay

PATAY ang usa ka kanhi drug surrenderee human gipusil-patay sa riding in tandem alas 9 sa gabii niadtong Lunes, Oktubre 9, didto sa Deca Homes Subdivision, Barangay Cabantian, dakbayan sa Davao.

Ang biktima nailhang si James Mayo Reyes, alyas “Payat,” 26, minyo, traysikol drayber ug residente sa Upper Laverna, Buhangin.

Nasayran nga namasahero lamang ang biktima dihang kalit giubayan sa riding in tandem dayon gipusil tumong sa ulo.

Namatay dayon ang biktima diha sa iyang gimaneho nga tarysikol samtang ang tandem mipaturatoy og padagan padung sa Cabantian area.

Dugang nasayran nga kanhi mitahan ang suspek sa Buhangin Police Station sa pagkalambigit niini sa gidiling druga.

Ang kapulisan sa Buhangin padayong naghimo og imbestigasyon aron mailhan ang mga mamumuno. (JPC)