Ilegal nga sugal nakaapekto sa STL

ANG ilegal na sugal sa nasud miresulta sa 30 porsyento na pag-ubos sa binulang kita sa Small-Town Lotteries (STLs) sa Philippine Charity Sweepstakes Office (PCSO), suma sa usa ka opisyal.

Sulti ni PCSO Spokesperson Florante Solmerin atol sa Kapehan sa Dabaw sa The Annex of SM City Davao nga nagalihok ang mga ahensya inubanan sa Philippine National Police (PNP) sa pagsikop sa mga nalambigit sa ilegal na sugal sama sa jueteng, masiao, underground cockfight, ug Last 2.

Kini ang mga sugal ang nakapugong sa ahensya nga dili maabot ang binulang target nga kita nga P1.5 billion.

"All the 75 STLs in the country accumulatively earn P1.1 billion a month. The P450 million could have been used to additional purchases and expenditures for our Individual Medical Assistance Program (Imap)," matud ni Solmerin.

Dugang niya nga mokabat sa 60 porsyento nga kaso sa ilegal na sugal sa niaging bulan sa Central Luzon, samtang 25 porsyento sa Visayas ug 15 porsyento sa Mindanao.

Base sa national monitoring, suma ni Solmerin na adunay mas gamay nga mga kaso ang natala sa Mindanao tungod sa mga opisyales sa PNP na kanunay nga aktibo sa pagimplementar sa maong away batok sa ilegal na sugal subay sa mandato ni Presidente Rodrigo Duterte.

Dugang ni Solmerin nga aduna pay mga pipila sa Mindanao nga nagagamit ug STLs aron sa pagtabong sa ilang dili mga awtorisadong pagpanugal apan, giseguro kini sa PCSO nga ilahang respondehan sa matag report nga ilang madawat pinaagi sa koordinasyon nila sa PNP ug local government units
sa matag syudad ug munisipalidad.

Sa laing bahin, nakahatag na og 10,000 ka trabaho ang mga STL sa Davao Region.

"Most of the individuals who are given the authorization to operate STLs are former gambling lords," taho ni Solmerin.

Ang pinakatumong sa STL, matud ni Solmerin, nga himuon ang mga ilegal na sugal na legal nga adunay labot nga buwis. (Rogie Llego, Ateneo de Davao University Intern)