DavSur, DavOcc ug Digos City pasado sa 'Good Financial Housekeeping'

DIGOS CITY -- Gipaguwa na sa Department of Interior and Local Government (DILG) ang listahan sa mga lugar sa nasud nga nakapasar sa "Good Financial Housekeeping."

Pasado niini ang 9 ka kalungsuran sa Davao del Sur apil ang dakbayan sa Digos, subay sa gipaguwang listahan sa DILG niadtong Oktubre 6, tuig kasamtangan.

Bisan ang lima ka mga lungsod sa Sta. Maria, Don Marcelino, Jose Abad Santos, Sarangani ug Malita sa Davao Occidental nakapasa sab.

Gumikan niini, nanghinaut si Davao Occidental Governor Claude Bautista nga makakuha sab sila sa Seal of Good Local Governance (SGLG) tungod sa maong rekord.

Samtang sa Magsaysay, gihangop ni Mayor Arthur Davin nga namentinar nila ang rekord sa maayong pagpadagan sa ilang munisipyo.

Daghang lugar sa nasud ang naglisud pagkab-ot sa maong pasidungog ilabi pa ang nga ang GFH maoy usa sa mga rekisitos aron makuha ang SGLG apil ang pagpasar sa full disclosure policy sa Commission on Audit.

Sa dakbayan sa Digos, gihangop sab ni Mayor Joseph PeƱas nga nakab-ot nila ang unang rekisitos alang sa pagkab-ot sa SGLG.

Nasayran nga makuting proseso ang pag-angkon niini sanglit kinahanglang adunay maayong rekord sa pinansiyal ang lokal nga gobyerno, andam sa pagresponde sa mga emerhensiya, pag-atiman sa kinaiyahan, kahapsay'g kalinaw ug nahatag ang tinuod nga pag-serbisyo sa katilingban.

Sa kasamtangan, nanghinaut ang mga napiling lokal nga gobyerno nga makab-ot na sab nila ang SGLG sanglit timailhan kini sa usa ka maayong pagdumala sa komunidad. (OBD)